هند خليفة: تعرضت للتكفير بسبب تحقيق حول تربح شيوخ من الترويج للتعدد
هذه شهادة الكاتبة الصحفية هند خليفة، التي قررت أن تروي للمرصد المصري للصحافة والإعلام، ما حدث معها كي ﻻ يظل العنف الرقمي في الظل:
عندي تجربة عنف رقمي على المستوى المهني، كان ليا تحقيق عملته عن التعدد، اسمه “سوق الجواري السلفي”.. ده عملته عن شخصيات من التيار السلفي بيستخدموا السوشيال ميديا للترويج للتعدد وكانوا بيتربحوا من ده بصور مختلفة.. عملت مغامرة صحفية وروحت بنفسي، هما كمان بيسهلوا الجواز العرفي تحت ستار إحنا ناس متدينين وبنشرع الحاجات دي، ورغم إن ناس كتير أشادت بالموضوع، إلا إن بعض الناس هاجموني لما نزلت بوست عن التحقيق وتفاصيله واتهموني إن أنا مش مسلمة لأن التعدد شرعي.
في التحقيق، أنا استشهدت باتنين من الشيوخ وأشرت في التحقيق إن الناس اللي بتروج للتعدد كانوا بيروجوا له عن طريق الاتنين دول.
أنا اتكفرت لأن بالنسبة للي هاجموني اتكلمت عن خط أحمر بالنسبة لهم، الموضوع زاد بقا واتهموني إن أنا بعترض على النصوص القرآنية اللي بتشرع التعدد، لقيت تعليقات بتكفرني وبتقولي اتقي الله وإن النماذج اللي اشتغلت عليها هيختصموني قدام ربنا.
أنا اشتغلت تحقيقات كتير لكن متهاجمتش غير في التحقيقات المتعلقة بالتيار الإسلامي.
على المستوى الشخصي، في موقف حصل واتسببلي في أذى نفسي كبير، بعد ما جاتلي رسايل بتضغط عليا عشان أغير ميولي عن طريق بنت ميولها غير سوية قالتلي من أكونت فيك إنها بتحبني عشان أغير ميولي وكانت مصممة أني أخوض التجربة معاها وقدرت أعرف هي مين واكشتفت إنها حد من داخل الوسط ومكانش عندي دليل دامغ هي مين، بس نزلت بوست عندي وأشرت أنها بتتعامل مع ناس كتير في الوسط الصحفي فحاولت أنبه الناس بشكل مش واضح أوي عشان احذرهم لأن ممكن حد تاني يتعرض للأذى النفسي ده.
لما اكتشفت هي مين، اكتشفت أنها مش بس بتتعامل مع صحفيات من الوسط، هي كمان بتتعامل مع ناجيات من العنف والتحرش وجها لوجه، طبعا ده غير رسايل الأذر والمضايقات.
أخيرا، أي بنت على السوشيال ميديا بتتعرض ليها وأي إنسان معرض لده والإنسان العاقل بيتجاهل الرسايل دي، بس رسايل البنت دي أنا معرفتش أتجاهلها وأخدت فترة عشان أقدر أتخطاها.