ليه بنطالب المؤسسات الصحفية أو النقابة بتوفير حضانات أطفال؟
ليه بنطالب المؤسسات الصحفية أو النقابة بتوفير حضانات أطفال؟
في إطار حملة مناهضة العنف ضد المرأة إحنا اخترنا نتكلم عن ضرورة توفير دور رعاية لأطفال الصحفيات، لأن الموضوع ده بيجمع قضايا مهمة زي الكلام عن حقوق المرأة وتمكينها، وكمان دعمها في تحقيق التوازن بين شغلها ومسؤولياتها العائلية إللي مفروض تكون مسئولية مشتركة بينها وبين الرجل، وكمان نقدر نناقش من خلاله حقوق النساء العاملات في المؤسسات الصحفية والنظرة التنميطية ليهم والتحديات إللي بيواجهوها.
اختيارنا للموضوع ده جاي من قناعتنا إن الصحفيات ليهم الحق في الدعم والمساندة علشان يحققوا توازن بين شغلهم وحياتهم الشخصية، لو إحنا فعلاً عايزين نعزز تمكين المرأة ونحسن ظروفها، لازم نفكر في حلول عملية ودور الحملة هنا إننا نسلط الضوء على مطلب حتمية وجود دور حضانة كما يكفل القانون، ونحرك النقاش حواليها علشان نحقق تغيير جاد.
ليه لازم يبقى في حضانة لأبناء الصحفيات؟فكرة وجود دور رعاية متخصصة للأطفال في أماكن عمل الصحفيات، أو جنبها، ممكن تكون خطوة عظيمة، ليه؟ لأنها بتوفر مكان آمن ومريح للأطفال، وفي نفس الوقت بتدي للأمهات فرصة يركزوا في شغلهم من غير قلق، ده كمان بيساهم في تقليل الضغط النفسي عليهم، وبيساعدهم يحسوا إنهم مش لوحدهم في المعادلة الصعبة دي.
وللأسف الموضوع مش بس مرتبط بمطلب الحضانة كمطلب منفصل، لكن كمان المجتمع إللي طول الوقت عنده نظرة تنميط للمرأة وشايف أنها لوحدها إللي عليها المسئولية الرعائية بيجبرها تحت الضغط ده يا إما تضحي بشغلها إللي بتحبه علشان أطفالها، أو إنها تسيب أطفالها في حضانات خاصة بتكلفها مبالغ كبيرة، وده في ظل أجور الصحفيين اللي مش دايمًا بتبقى كافية، فالحل هنا يكون إيه؟ الحل ببساطة إن المؤسسات الصحفية أو نقابة الصحفيين توفر حضانات للأطفال.
طب قانون العمل بيقول إيه ؟الموضوع ده بيتكلم عنه قانون العمل المصري وخصوصًا الجزء اللي بينظم تشغيل الستات في مصر، أغلب الستات اللي شغالة في الصحافة بتتبع القانون ده لأنه هو اللي بينظم علاقة الشغل تنظيم كامل.
قانون العمل رقم 12 لسنة 2003 خصص فصل كامل عشان يناقش تشغيل الستات، من مادة 88 لحد 97. القانون ده أخد شوية حاجات من اتفاقية حماية الأمومة رقم 183، لكنه للأسف ما اهتمش باتفاقية العمال اللي عندهم مسؤوليات عائلية، وبالتالي فضل شايف إن الأدوار العائلية خاصة بالستات بس. عشان كده، ادّى لهم شوية حقوق، اللي هي:
1- إجازة الوضع (الولادة):القانون بيدي الست حق تاخد 3 شهور إجازة مدفوعة الأجر لما تولد، بشرط:
تكون اشتغلت في المكان ده 10 شهور على الأقل.
تقدم شهادة طبية بتحدد موعد الولادة.
ما تستخدمش الإجازة أكتر من مرتين طول فترة شغلها.
ما تشتغلش في مكان تاني خلال الإجازة، وإلا يحق لصاحب الشغل يحرمها من الأجر.
2- ساعة رضاعة يوميًا:الستات اللي بيجيبوا أطفال ليهم ساعة رضاعة كل يوم لمدة سنتين من تاريخ الولادة، سواء يقسموها لنص ساعة مرتين أو ياخدوها مرة واحدة، وده بدون خصم من الأجر.
3- إجازة رعاية طفل:الست اللي تخلف ليها حق تاخد إجازة بدون أجر لرعاية طفلها لمدة ما تزيدش عن سنتين، بشرط:
يكون عند صاحب الشغل أكتر من 50 عامل/عاملة.
ما تستخدمش الإجازة أكتر من مرتين.
4- دار حضانة في مكان الشغل:القانون بيجبر صاحب العمل يعمل حضانة لو عنده 100 ست شغالة أو أكتر، ولو العدد أقل من كده يشترك مع أصحاب شغل تانيين في نفس المنطقة.
التعديلات الجديدة:دلوقتي البرلمان بيناقش قانون عمل جديد فيه شوية تعديلات مهمة:
إجازة الوضع زادت لـ 4 شهور بدل 3.
العدد المطلوب للعاملات عشان يستفيدوا بإجازة رعاية الطفل قل من 50 لـ 25.
صاحب الشغل بقى مطالب إنه يعلق نظام تشغيل الستات حتى لو عنده عاملة واحدة بس.
شروط الحضانة بقت خاضعة لقانون الطفل بدل قرارات وزير العمل.
طيب إيه النتيجة؟قانون العمل خطوة كويسة لتحسين وضع الستات في الشغل، لكن لسه فيه مشاكل زي:
– غياب عقوبات قوية عشان أصحاب الشغل يلتزموا.
– النظرة اللي شايفة إن الست مسؤولة لوحدها عن البيت والأطفال.
عشان كده، محتاجين:– إلغاء شرط وجود عدد معين من العاملات عشان يستفيدوا بحقوقهم.
– فرض عقوبات أقوى على المخالفين.
– مشاركة الرجالة في إجازات الرعاية لتخفيف الحمل عن الستات.
– تعديل الغرامات عشان تناسب الوضع الاقتصادي الحالي.
– التعديلات دي هتخلي بيئة الشغل أكثر عدالة وتشجع على المساواة بين الرجالة والستات.
طيب إيه الأثر الإيجابي لإنشاء حضانات؟
لما تبقى في حضانة لأطفال الصحفيات، النتايج هتبقى إيجابية جدًا: الصحفيات هيقدروا يركزوا في شغلهم أكتر، لأنهم مطمئنين على ولادهم. هتزيد إنتاجية الصحفيات وجودة شغلهم. هيبقى في رسالة دعم قوية للمرأة، وده هيشجع أكتر البنات يدخلوا المجال الصحفي. كمان، لما يكون في حضانة، ده هيقلل من احتمالية إن الصحفيات يسيبوا شغلهم عشان يعتنوا بأطفالهم، وده معناه إن المؤسسات مش هتفقد كوادر مهمة. في النهاية؟ في النهاية حملتنا دي هدفها أننا نطالب نقابة الصحفيين بتبني توفير حضانة لأطفال الصحفيات أو تتبنى المؤسسات الصحفية بموجب القانون توفير حضانة أو الاشتراك في حضانة لو العدد أقل من 100.
وبندعوكم للتدوين معانا في حملتنا عن الموضوع ده علشان نقدر نوصل في النهاية لتوصيات تاني ومقترحات ممكن تفيد الصحفيات وتدعم أدوارهن المهمة.