رسالة المصور الصحفي إسلام جمعة

النهارده 1 أغسطس، عيد ميلاد إسلام جمعة، المصور الصحفي بموقع فيتو، وبالمناسبة دي إسلام بعت رسالة من محبسه، وقال فيها:

“صباح أو مساء الخير عليكم، وحشتوني جدًا ووحشتني الكاميرا والصور والانستجرام، بكره أنا هكمل 22 سنة وهيبقى تاني عيد ميلاد ليا في السجن.
خلونى أقول لكم إن رسايلكم ودعمكم بيوصلوا لي ومخلينى مستحمل ومكمِّل، مع كل صورة بشوفها فى جريدة أو مجلة بتأكد إن حنينى للكاميرا منقصش ومع الرسم اللى برسمه فى خيالى لكادرات جديدة للصورة بيفضل عندي يقين إنى لسه قادر أكمل وإن عمري ما هنسى التصوير مهما عدى الوقت، أنا بخير الحمد لله ومعنوياتي مرتفعة جدًا وواثق إنى طالع قريب جدًا بإذن الله، آخر حاجة الرسايل اللى بعتوها لي من كام شهر وصلتنى قريب وبسطتنى جدًا جدًا

#الحرية_للكاميرا “.
—
إسلام محبوس من يوم 29 يونيو 2018، يعني أكتر من سنة.. ووجهت له النيابة تهمتين وهما الانضمام لجماعة أُسست على خلاف القانون، ونشر أخبار كاذبة.

ومن وقتها وهو محبوس احتياطيًا على ذمة القضية رقم 441 لسنة 2018 حصر أمن دولة